SHREE TARATARINI STUTI ଶ୍ରୀ ତାରାତାରିଣୀ ସ୍ତୁତି

 ଶ୍ରୀ ତାରାତାରିଣୀ ସ୍ତୁତି

JAYA MAA TARATARINI

ଜୟ ଜୟ ମାଗୋ ସଙ୍କଟ ତାରିଣୀ /

ନମସ୍ତେ ନମସ୍ତେ ମାଗୋ ଶଙ୍କର ମୋହିନୀ //

ନମସ୍ତେ ନମସ୍ତେ ମାଗୋ ଶ୍ରୀ ଦୁର୍ଗା ପାର୍ବତୀ /

ନମଇଁ ପୟରେ ମାଗୋ ଫେଡ଼ ମୋ ଦୁର୍ଗତି //

କଙ୍କାଳମାଳକୁ ମାଗୋ କରିଛୁ ଧାରଣ /

କରଯୋଡ଼ି ପଦ୍ମପାଦେ କରୁଛି ବନ୍ଦନ //

ଖଳକୁ ନାଶିଲୁ ଖର ଦୃଷ୍ଟିରେ ଗୋ ମାତ /

ଖଣ୍ଡା ଖର୍ପର ଧରିଣ ବଧିଲୁ ଦଇତ୍ୟ //

ଗଜାନନ ଜନନୀ ଗୋ ଗିରିରାଜସୁତା /

ଗଉରୀ ତୋ ନାମ ମାଗୋ ଗିରିଜା ବନିତା //

ଘର୍ଘରନାଦିନୀ ଘନ ଜୀମୁତବରନା /

ଘୋର ଦୈତ୍ୟବିନାଶିନୀ ଘୂର୍ଣ୍ଣିତନୟନା //

ଓଁକାର ରୂପିଣୀ ମାଗୋ ଉମା କାତ୍ୟାୟିନୀ /

ଉଗ୍ରଚଣ୍ଡୀ ପ୍ରଚଣ୍ଡା ଗୋ ଐଶ୍ୱର୍ଯ୍ୟ ଦାୟିନୀ //

ବିକ୍ରମିଲୁ ନେଇ କାତ୍ୟାୟିନୀ ଚଣ୍ଡିକା ଚାମୁଣ୍ଡି /

ଚଣ୍ଡନାୟିକା ଗୋ ମୁଣ୍ଡେ ସିନ୍ଦୁରକୁ ମଣ୍ଡି //

ଛଳେ ଚଣ୍ଡମୁଣ୍ଡ ଦୈତ୍ୟ ନାଶିଲୁ ଗୋ ମାତ /

ଛାୟା ରୂପେ ବ୍ୟାପିଅଛୁ ସକଳ ଜଗତ //

ଜଗତ ଜନନୀ ଜୟ ଜଠରୁ ତୋହର /

ଜନମିଲେ ଦେବଗଣ ଅମର କିନ୍ନର //

ଝଟକ ବିଜୁଳି ପ୍ରାୟ ଦିଶଇ ତୋ ଆଭା /

ଝଳି ନଖ ପାଦପଦ୍ମେ କି ସୁନ୍ଦର ଶୋଭା //

ଓଁକାର ମୂରତି ତୋର ଅତି ଶୋଭାବନ /

ଓଁ ଅକ୍ଷର ତୋ ମୁଖ ନାସାରୁ ଉତ୍ପନ୍ନ //

ଟଙ୍କଧର ଘରଣୀ ମା ଟହ ଟହ ହାସୀ /

ଟାଣଲୋକ ଟାଣ ଭାଙ୍ଗିଦେଉ ଚାରୁକେଶୀ //

ଠାକୁରାଣୀ ରୂପେ ଥାଉ ବ୍ରହ୍ମାଣ୍ଡରେ ତୁହି /

ଠାବ ଦିଅ ମୋତେ ମାଗୋ ପାଦତଳେ ନେଇ //

ଡ଼ମ୍ବରୁଧରଙ୍କ ମନମୋହିନୀ ଗୋ ମାତ /

ଡ଼ାଙ୍କିନୀଗଣଙ୍କୁ କଲୁ ଶ୍ରୀଅଙ୍ଗରୁ ଜାତ //

ଢ଼ାଳେ କୃପା ବାରି ଢ଼ାଳିଦିଅ ମୋ ଉପରେ /

ଢ଼ଳ ଢ଼ଳ ନୟନୀ ମୁଁ ବିପଦ ସାଗରେ //

ଅନନ୍ତ ମୁରତି ତୋର କି ଅନ୍ତ ପାଇବି /

ଅମ୍ବାଳିକା ଅମ୍ବିକା ମା ମୋର ମୁକ୍ତି ଭାବି //

ତାମରସ ମୁଖୀ ମାଗୋ ତରଳ ଲୋଚନା /

ତାରିଣୀ ତାରାଗୋ ଜୟ କାଞ୍ଚନ ବରନା //

ଥରହର ହୁଏ ଦେହ ସର୍ବଦା ମୋହର / 

ଥରେ ମାତ୍ର ବିପଦରୁ ମୋତେ ରକ୍ଷା କର //

ଦୁର୍ଗତି ତାରିଣୀ ଦୁର୍ଗା ଦୁଃଖ ଶୋକହରା / 

ଦନୁଜ ଦଳିନୀ ବିଦ୍ୟାଧାରୀ ଦିଗମ୍ବରା //

ଧରଣୀର ମହାଭାରା ଉଶ୍ବାସିଲୁ ମାତ /

ଧରି ହସ୍ତେ ଶଙ୍ଖ ଚକ୍ର ଗଦା ଅସୀ କୁନ୍ତ //

ନମସ୍ତେ ନମସ୍ତେ ମାଗୋ ଶୈଳେନ୍ଦ୍ର ନନ୍ଦିନୀ /

ନମସ୍ତେ ନମସ୍ତେ ମାଗୋ ଆନନ୍ଦ ଦାୟିନୀ //

ପର୍ବତ ବାସିନୀ ମାଗୋ ପରମ ଈଶ୍ୱରୀ /

ପଦ୍ମହସ୍ତା ପଦ୍ମାଳୟା ପର୍ବତ କୁମାରୀ //

ଫୁଲ ଅରବିନ୍ଦ ନିନ୍ଦି ଶୋଭା ତୋ ବଦନ /

ଫୁଟିଲା କମଳ ପରି ଦିଶେ ଶୋଭାବନ //

ବରାନନା ବରଦା ଗୋ ବଳାହକ କେଶୀ /

ବୃନ୍ଦାରକ ବୃନ୍ଦ ନିତ୍ୟ ତବ ନାମ ଘୋଷି //

ଭବଭୟ ନାଶିନୀ ଗୋ ଭକତ ପାଳିନୀ /

ଭବାନୀ ପାର୍ବତୀ ଭୀମା ଭୀଷଣ ନାଦିନୀ //

ମହାରାତ୍ରି ମହୋରାତ୍ରି ତୁହି ମାହେଶ୍ୱରୀ /

ମହାବିଦ୍ୟା ମହାକାଳୀ ମହିମା ତୋହରି //

ଯେତେବେଳେ ଘୋର ରୂପ ଧଇଲୁ ଗୋ ମାତ /

ଯାତୁଧାନ ଗଣ ହେଲେ ଭୟେ ଇତସ୍ତତ //

ରକ୍ତ ମାଂସ ମଦ୍ୟପାନେ ସନ୍ତୋଷ ତୋହର /

ରାକ୍ଷସଗଣଙ୍କୁ ନାଶି ରଖିଲୁ ଅମର //

ଲଳିତରେ ବଧ କଲୁ ମହିଷାସୁରକୁ /

ଲାବଣ୍ୟ ରୂପରେ ନାଶ କଲୁ ଦନୁଜକୁ //

ବନ୍ଦନା ମୁଁ ନ ଜାଣଇ ବାରିଦ ବରନା / 

ବିଲ୍ଵଦଳ ବିମଣ୍ଡିନା ବନଜ ନୟନା //

ଶଙ୍କରୀ ସର୍ବାଣୀ ଶମ୍ଭୁଚିତ୍ତ ବିଳାସିନୀ /

ଶରତ କାଳେ ଉତ୍ସବ ପାଳଇ ଅବନୀ //

ଷଡ଼ାନନ ଜନନୀ ମା ଷୋଳଭୁଜ ତୋର /

ଷଷ୍ଠ ଶତ ସହସ୍ର ଲୋଚନ ଆଜ୍ଞା କର //

ସଂହାର କାରିଣୀ ସଦାନନ୍ଦ ମହାସତୀ / 

ଶାରଦା ସୁଭଦ୍ରା ସ୍ୱାହା ସୁଧା ଲଜ୍ୟାବତୀ //

ହରଜାୟା ହରପ୍ରିୟା ହରିପୃଷେ ବସି / 

ହୁଙ୍କାର ଶବଦେ ଧୂମ୍ର ଲୋଚନକୁ ନାଶି //

କ୍ଷମାକର ଦୋଷ ମା ଧୃତି ମତି ସ୍ତୁତି /

କ୍ଷମା ଲଜ୍ଯା ତୁଷ୍ଟି ପୁଷ୍ଟି ଭ୍ରାନ୍ତି ଆଉ କ୍ଷାନ୍ତି //

💮 💮 💮

ସ୍ତୁତି ମାଳିକା 

ଶ୍ରୀ ଗଣେଶ ସ୍ତୁତି

ମା ଦୁର୍ଗା ସ୍ତୁତି

ମା ମଙ୍ଗଳା ସ୍ତୁତି

ଶ୍ରୀ ଜଗନାଥ ସ୍ତୁତି

ଶ୍ରୀ ନାରାୟଣ ସ୍ତୁତି

ଶ୍ରୀ ଶିବ ସ୍ତୁତି

ଶ୍ରୀ ନବଗ୍ରହ ସ୍ତୁତି

ଶ୍ରୀ ସୂର୍ଯ୍ୟ ନାରାୟଣ ସ୍ତୁତି

ବ୍ରତାବଳି କଥା

oomii05.com